राष्ट्रपती द्रौपदी मुर्मू यांच्यासमोर मनोगत व्यक्त करण्याचा आयपीएस विवेक शिंदे यांना बहुमान; सांगली जिल्ह्याचा गौरव! खानापूर : भारतीय पोलीस सेवा (IPS) ७८ आरआर (२०२५ तुकडी) च्या प्रशिक्षणार्थी अधिकाऱ्यांनी भारताच्या महामहिम राष्ट्रपती श्रीमती द्रौपदी मुर्मू यांची सदिच्छा भेट घेतली. हा विशेष कार्यक्रम भारताचे गृहसचिव श्री. गोविंद मोहन आणि सरदार वल्लभभाई पटेल राष्ट्रीय पोलीस अकादमीचे संचालक श्री. सुजित पांडे यांच्या प्रमुख उपस्थितीत संपन्न झाला. या विशेष प्रसंगी ७८ आरआर (२०२५ तुकडी) च्या वतीने मनोगत व्यक्त करण्यासाठी निवड झालेल्या तीन प्रशिक्षणार्थी अधिकाऱ्यांमध्ये महाराष्ट्राचे प्रतिनिधित्व करण्याचा बहुमान आयपीएस अधिकारी विवेक शिंदे यांना मिळाला. राष्ट्रपतींसमोर आपल्या तुकडीच्या वतीने मनोगत व्यक्त करण्याची संधी मिळणे ही अत्यंत गौरवास्पद बाब आहे. खानापूर घाटमाथ्याचे नेते श्री. राजाभाऊ शिंदे यांचे बंधू श्री. कृष्णराव शिंदे यांचे सुपुत्र असलेल्या आयपीएस विवेक शिंदे यांच्या या उल्लेखनीय कामगिरीमुळे संपूर्ण महाराष्ट्रासह सांगली जिल्हा आणि खानापूर तालुक्याच्या शिरपेचात मानाचा तुरा रोवला गेला आहे. त्यांच्या या यशाबद्दल सर्व स्तरांतून अभिनंदनाचा वर्षाव होत असून, त्यांच्या पुढील प्रशासकीय सेवेसाठी आणि देशसेवेच्या वाटचालीसाठी मनःपूर्वक शुभेच्छा व्यक्त केल्या जात आहेत. विवेक शिंदे यांच्या कर्तृत्वाने खानापूर तालुक्याचा नावलौकिक राष्ट्रीय स्तरावर पोहोचला असून, ही संपूर्ण परिसरासाठी अभिमानाची आणि गौरवाची बाब आहे.