आटपाडी पोलिसांची धडक कारवाई, देशी पिस्तूल आणि ३ जिवंत काडतुसे जप्त, तासगावचा तरुण अटकेत! आटपाडी पोलिसांनी गोपनीय माहितीच्या आधारे नेलकरंजी-भिवघाट मार्गावरील कॅनॉल परिसरात सापळा रचून मोठी कारवाई केली. या कारवाईत तासगाव तालुक्यातील वैभव संपत माळी (वय २३) याला देशी बनावटीचे पिस्तूल आणि ३ जिवंत काडतुसे बाळगल्याप्रकरणी अटक करण्यात आली. आरोपीकडून सुमारे ₹७३ हजारांचा मुद्देमाल जप्त करण्यात आला असून त्याच्याविरुद्ध भारतीय शस्त्र अधिनियम व महाराष्ट्र पोलिस अधिनियमांतर्गत गुन्हा दाखल करण्यात आला आहे. ही कारवाई पोलीस निरीक्षक संतोष पवार यांच्या मार्गदर्शनाखाली पोलीस उपनिरीक्षक अमोल खरात व आटपाडी पोलिसांच्या पथकाने यशस्वीरित्या पार पाडली.