मतदारसंघात जलक्रांतीची नवी वाट! १७५ ताडपत्री बंधाऱ्यांची उभारणी पूर्ण राज्यमंत्री अॅड. आशिष जयस्वाल यांच्या पुढाकारातून जलसंधारण चळवळीला गती; मुख्यमंत्री देवेंद्र फडणवीस व केंद्रीय मंत्री नितीन गडकरी यांच्याकडून उपक्रमाचे कौतुक **रामटेक :** रामटेक विधानसभा मतदारसंघात जलसंधारण आणि भूजलपातळी वाढविण्याच्या उद्देशाने ताडपत्री बंधाऱ्यांची मोठ्या प्रमाणावर उभारणी करण्यात येत आहे. राज्यमंत्री अॅड. आशिष जयस्वाल यांच्या पुढाकारातून सुरू असलेल्या या उपक्रमांतर्गत आतापर्यंत जवळपास १७५ ताडपत्री बंधाऱ्यांचे काम पूर्ण झाले आहे. दररोज दोन बंधारे उभारण्याचा वेग या अभियानाने गाठला असून, शेतकऱ्यांकडूनही या उपक्रमाला मोठी मागणी होत आहे. आर्ट ऑफ लिव्हिंगच्या माध्यमातून तसेच रंजीत घिवदोंडे यांच्या अथक परिश्रमातून ही जलसंधारण चळवळ प्रत्यक्षात साकारत आहे. नुकत्याच झालेल्या मुख्यमंत्री देवेंद्र फडणवीस आणि केंद्रीय मंत्री नितीन गडकरी यांच्या भेटीदरम्यान राज्यमंत्री अॅड. आशिष जयस्वाल यांनी १७५ ताडपत्री बंधाऱ्यांच्या कामाची माहिती देणारी पुस्तिका त्यांना सादर केली. यावेळी दोन्ही नेत्यांनी या उपक्रमाचे विशेष कौतुक केले. रामटेक पॅटर्नमधील शेत-पाणंद रस्ते योजना आणि सॅनिटरी पॅड योजना ज्याप्रमाणे महाराष्ट्रभर लोकप्रिय झाल्या, त्याचप्रमाणे ताडपत्री बंधाऱ्यांची ही जलसंधारण चळवळदेखील संपूर्ण महाराष्ट्रासाठी आदर्श ठरेल, असा विश्वास राज्यमंत्री अॅड. आशिष जयस्वाल यांनी व्यक्त केला. लवकरच मुंबई येथे उपमुख्यमंत्री एकनाथ शिंदे यांनाही या उपक्रमाची पुस्तिका सादर करण्यात येणार आहे. या बंधाऱ्यांमुळे केवळ पाणी अडविण्याचे काम होत नसून गावागावांत जलसमृद्धीचा नवा मार्ग निर्माण होत आहे. काही ठिकाणी एक ते दीड किलोमीटर, तर काही ठिकाणी चार ते पाच किलोमीटरपर्यंत पाण्याचा नैसर्गिक साठा निर्माण झाला आहे. त्यामुळे जमिनीतील भूजलपातळी वाढण्यास, विहिरी व बोअरवेलचे पुनर्भरण होण्यास आणि नैसर्गिक जलस्रोत समृद्ध होण्यास मदत होत आहे. याचा थेट लाभ शेतकऱ्यांना होत असून गहू, मिरची आणि इतर रब्बी पिकांच्या सिंचनासाठी पाणी उपलब्ध होत आहे.