अहेरीत घरपट्टी व वीजबिलाच्या समस्यांविरोधात झटका आंदोलन भाग्यश्रीताई आत्राम हलगेकर यांच्या नेतृत्वात आंदोलन; अधिकाऱ्यांकडून समस्यांच्या निराकरणाचे आश्वासन अहेरी : अहेरी शहरातील नागरिकांना भेडसावणाऱ्या वाढीव घरपट्टी आणि अवाजवी व चुकीच्या वीजबिलांच्या प्रश्नावर प्रशासनाचे लक्ष वेधण्यासाठी राष्ट्रवादी काँग्रेस पक्ष (शरदचंद्र पवार) तालुका शाखा अहेरीच्या वतीने राजे विश्वेश्वरराव महाराज चौक येथे झटका आंदोलन करण्यात आले. या आंदोलनाचे नेतृत्व गोंडवाना विद्यापीठाच्या सिनेट सदस्य भाग्यश्रीताई आत्राम हलगेकर यांनी केले. आंदोलनामुळे शहरातील नागरिकांच्या मूलभूत नागरी समस्यांचा प्रश्न पुन्हा ऐरणीवर आला आहे. शहरातील नागरिकांवर अन्यायकारक पद्धतीने वाढीव घरपट्टी लादली जात असल्याचा, तसेच अनेक वीजग्राहकांना अवाजवी व चुकीची वीजबिले पाठविली जात असल्याचा आरोप आंदोलनकर्त्यांनी केला. यामुळे सर्वसामान्य नागरिक आर्थिक अडचणीत सापडले असून प्रशासनाने या प्रश्नांकडे गांभीर्याने लक्ष द्यावे, अशी मागणी करण्यात आली. यावेळी घरपट्टीचे शासकीय निकषांनुसार पुनर्मूल्यांकन करून वाढीव घरपट्टी रद्द करावी, चुकीच्या वीजबिलांची सखोल चौकशी करून ग्राहकांना सुधारित बिले द्यावीत, तसेच नागरिकांच्या तक्रारींचे तातडीने निराकरण करावे, अशा विविध मागण्या करण्यात आल्या. आंदोलनाची दखल घेत संबंधित विभागांचे अधिकारी आंदोलनस्थळी दाखल झाले. त्यांनी आंदोलकांशी चर्चा करून नागरिकांच्या समस्या जाणून घेतल्या आणि त्यांचे निराकरण करण्याचे आश्वासन दिले. त्यानंतर आंदोलनाची सांगता करण्यात आली. या आंदोलनात जहरुद्दीन हकीम, नगरसेवक अमोल मुक्कावार, नगरसेवक श्रीनिवास चटारे, वेलगूरचे उपसरपंच महेश मोहरले, श्रीनिवास वीरगोनवार, ग्रामपंचायत सदस्य सालाया कंबलवार, इमायत शेख, रामू कस्तुरवार, सुमित मौतकुरवार, स्वप्निल श्रीरामवार, राहुल दुर्गे, विनोद रामटेके, अमोल रामटेके, गंगाराम मलग्याम यांच्यासह शोभा मडावी, पुष्पा मडावी, सविता बाईन, सविता करपेत, रसिका आत्राम, स्मिता येमुलवार, पद्मा मुन्नूरवार, पुष्पा आत्राम तसेच पक्षाचे पदाधिकारी, कार्यकर्ते आणि नागरिक मोठ्या संख्येने सहभागी झाले होते. आता प्रशासनाच्या आश्वासनानंतर घरपट्टी व वीजबिलांच्या समस्यांवर प्रत्यक्षात कितपत कार्यवाही होते, याकडे अहेरीकर नागरिकांचे लक्ष लागले आहे.