आटपाडीच्या उज्वला जेडगेची राज्यस्तरीय कुस्ती स्पर्धेत भरारी १९ वर्षांखालील गटात तिसरा क्रमांक; तालुका, जिल्हा आणि पुणे विभागात प्रथम क्रमांक मिळवत गाठली राज्यस्तरीय स्पर्धा आटपाडी प्रतिनिधी शेतकरी कुटुंबातील उज्वला दत्तात्रय जेडगे हिने राज्यस्तरीय शालेय कुस्ती स्पर्धेत तिसरा क्रमांक पटकावत आटपाडी तालुक्याच्या शिरपेचात मानाचा तुरा रोवला. क्रीडा व युवक सेवा संचालनालय, महाराष्ट्र शासन तसेच स्कूल गेम फेडरेशन ऑफ इंडिया यांच्या वतीने आयोजित स्पर्धेत १९ वर्षांखालील वयोगटात तिने हे यश मिळवले. ग्रामीण भागातून पुढे येत कुस्तीच्या मैदानात तिने मिळवलेल्या यशाचे कौतुक होत आहे. उज्वलाचे वडील दत्तात्रय जेडगे यांचा शेती व्यवसाय आहे. उज्वलाने बोंबेवाडी येथील जिल्हा परिषद शाळेत पहिली ते चौथीपर्यंतचे शिक्षण घेतले. त्यानंतर गुरुकुल विद्यालय, बोंबेवाडी येथे पाचवी ते दहावीपर्यंतचे शिक्षण पूर्ण केले. सध्या ती सोलापूर जिल्ह्यातील करमाळा तालुक्यातील वाशिंबे येथील अभिनव कुस्ती संकुल व कॉलेजमध्ये बारावीच्या वर्गात शिक्षण घेत आहे. शिक्षणासोबत कुस्तीचा सराव सुरू ठेवत तिने राज्यस्तरावर यश मिळवले. *तालुक्यापासून राज्यस्तरापर्यंत यशस्वी वाटचाल* उज्वलाने तालुकास्तरीय कुस्ती स्पर्धेत प्रथम क्रमांक मिळवून आपल्या यशाची सुरुवात केली. त्यानंतर जिल्हास्तरीय स्पर्धेतही प्रथम क्रमांक पटकावला. पुणे विभागीय स्तरावरील स्पर्धेत अव्वल स्थान मिळवत तिने राज्यस्तरीय स्पर्धेत प्रवेश केला. राज्यस्तरावर तिसरा क्रमांक मिळवून तिने आपल्या मेहनतीची आणि कुस्तीतील कौशल्याची छाप पाडली. तिला हरियाणाचे कुस्ती प्रशिक्षक नरेश कुमार यांचे मार्गदर्शन लाभले. त्यांच्या मार्गदर्शनाखाली तिने सराव आणि स्पर्धेची तयारी केली. सातत्यपूर्ण मेहनत, जिद्द आणि आत्मविश्वासाच्या जोरावर तिने हे यश संपादन केले. *आटपाडी तालुक्यातील पहिली महिला कुस्तीगीर म्हणून नावलौकिक* उज्वलाच्या यशामुळे आटपाडी तालुक्यात महिला कुस्तीला प्रोत्साहन मिळण्याची अपेक्षा व्यक्त होत आहे. तालुक्यातील पहिली महिला कुस्तीगीर म्हणून तिचा नावलौकिक होत असून, ग्रामीण भागातील मुलींसाठी तिची कामगिरी प्रेरणादायी ठरत आहे. शेतकरी कुटुंबातून आलेल्या उज्वलाने कुस्तीच्या क्षेत्रात राज्यस्तरापर्यंत मजल मारल्याने तिच्या यशाचे विशेष महत्त्व आहे. या यशाबद्दल अभिनव कुस्ती संकुल व कॉलेजचे संस्थापक अध्यक्ष आबासाहेब झोळ आणि प्राचार्य महादेव जगन्नाथ झोळ यांनी उज्वलाचे अभिनंदन करून पुढील शैक्षणिक व क्रीडा वाटचालीस शुभेच्छा दिल्या.