दुर्गापूर पोलीस ठाण्यात शारदा-दुर्गा मंडळांची आढावा बैठक; शांततामय उत्सवासाठी थेट संवादावर भर ​चंद्रपूर: सण-उत्सव कागदोपत्री न ठरवता प्रत्यक्ष नियोजनातून आणि शांततेत साजरे करण्यासाठी दुर्गापूर पोलीस ठाण्याचे पोलीस निरीक्षक संतोष शेगावकर यांच्या पुढाकाराने शारदा व दुर्गा मंडळांच्या पदाधिकाऱ्यांची आढावा बैठक पार पडली. या बैठकीत आगामी उत्सवांच्या पार्श्वभूमीवर कायदा व सुव्यवस्था, वाहतूक नियोजन, ध्वनिक्षेपकाचा वापर, सुरक्षितता आणि सामाजिक सलोखा या विषयांवर सविस्तर चर्चा करण्यात आली. पोलीस प्रशासनाने थेट संवाद साधून अडचणी व सूचना समजून घेतल्याने पोलीस आणि मंडळांमधील समन्वयाला नवी दिशा मिळाली आहे. ​यावेळी शांतता समिती सदस्य, शिवसेना चंद्रपूर तालुका प्रमुख तथा शिवसेना भारतीय कामगार संघटनेचे जिल्हाध्यक्ष संतोष लिलाबाई दशरथ पारखी यांनी आपले विचार मांडले. उत्सव हे धार्मिक उत्साहासोबत सामाजिक एकोपा व शांततेचा संदेश देणारे असावेत, असे सांगत त्यांनी सर्वांना पोलीस प्रशासनास सहकार्य करण्याचे आवाहन केले. पोलीस निरीक्षक संतोष शेगावकर यांनी नियमांचे पालन करून उत्सव साजरा करण्याचे आवाहन करत, उत्सवाच्या उत्साहासोबतच कायदा व सुव्यवस्थेला सर्वोच्च प्राधान्य दिले जाईल असे स्पष्ट केले. या उपक्रमामुळे पोलीस आणि मंडळांमध्ये थेट समन्वय निर्माण होऊन शांतता राखण्यास मोठी मदत होणार आहे.