वरवट येथील KVR कंपनीत ५० हजार रुपयांची खंडणी मागत मॅनेजरला मारहाण करणाऱ्या ३ गुंडांना दुर्गापूर पोलिसांकडून अटक ​दुर्गापूर: वरवट परिसरातील KVR कंपनीचे मॅनेजर साईप्रकाश गाजुला यांना "यहा कंपनी चलानी है तो महीने के ५०,०००/- रु. देणे पड़ेंगे, पैसे नही दिये तुझे मार डालूंगा" अशी धमकी देत मारहाण करणाऱ्या व खंडणी मागणाऱ्या तीन अट्टल आरोपींना दुर्गापूर पोलिसांनी आज तत्परतेने कारवाई करत अटक केली आहे. ​मिळालेल्या माहितीनुसार, आज दिनांक ०७ ऑक्टोबर २०२६ रोजी दुर्गापूर पोलीस स्टेशन अंतर्गत येणाऱ्या वरवट येथील KVR कंपनीमध्ये तीन इसम बेकायदेशीरपणे शिरले. त्यांनी कंपनीचे मॅनेजर साईप्रकाश गाजुला यांच्याकडे दरमहा ५० हजार रुपयांच्या हप्त्याची (खंडणीची) मागणी केली. मॅनेजरने विरोध दर्शवला असता आरोपींनी त्यांना अवाच्य भाषेत शिवीगाळ करत जीवे मारण्याची धमकी दिली आणि थेट मारहाण केली. ​या घटनेनंतर मॅनेजर साईप्रकाश गाजुला यांनी तातडीने दुर्गापूर पोलीस ठाण्यात धाव घेऊन तक्रार नोंदवली. प्राप्त तक्रारीच्या आधारे दुर्गापूर पोलिसांनी तात्काळ सूत्रे हलवत आरोपी क्र. १) अजय कुचनकर, २) सुमित रामटेके आणि ३) पवन जाधव या तिघांविरुद्ध भारतीय न्याय संहिता (BNS) कलम ३०८(४), ३०८(५), ११५(२), ३३३ आणि ३(५) अन्वये गंभीर गुन्हा दाखल केला.