पाठलाग करून मारहाण, पैशांची लूट; गांधी चौक पोलिसांकडून आरोपींची गंजगोलाईत धिंड लातूर | प्रतिनिधी पाठलाग करून एका व्यक्तीला मारहाण करत त्याच्याकडील रोख रक्कम लुटल्याच्या प्रकरणातील आरोपींवर गांधी चौक पोलिसांनी कठोर कारवाई करत त्यांची गंजगोलाई मार्केट परिसरातून धिंड काढली. या कारवाईमुळे परिसरात मोठी गर्दी झाली असून नागरिकांमध्ये या घटनेची जोरदार चर्चा रंगली. पोलिसांनी दिलेल्या माहितीनुसार, आरोपींनी एका व्यक्तीचा पाठलाग करून त्याला बेदम मारहाण केली. त्यानंतर त्याच्याकडील रोख रक्कम लुटून पसार झाल्याचा आरोप आहे. घटनेची माहिती मिळताच गांधी चौक पोलिसांनी तातडीने तपासाची चक्रे फिरवत आरोपींना ताब्यात घेतले. गुन्हेगारीला आळा घालण्यासाठी आणि कायद्याचा धाक निर्माण करण्याच्या उद्देशाने पोलिसांनी कडेकोट बंदोबस्तात आरोपींची गंजगोलाई मार्केट परिसरातून धिंड काढली. या वेळी मोठ्या संख्येने नागरिकांनी उपस्थित राहून ही कारवाई पाहिली. यापुढेही शहरातील गुन्हेगारांविरुद्ध कठोर कारवाई सुरूच राहील. शहरातील कायदा व सुव्यवस्था अबाधित राखण्यासाठी पोलिस प्रशासन कटिबद्ध असल्याचे गांधी चौक पोलिसांनी स्पष्ट केले.